Eph 1 | NdeIBE | STEP | UPhawuli, umphostoli kaKhristu uJesu ngentando kaNkulunkulu, Kubangcwele abase-Efesu, abathembekileyo kuKhristu uJesu:

Ephesians 1

1 UPhawuli, umphostoli kaKhristu uJesu ngentando kaNkulunkulu, Kubangcwele abase-Efesu, abathembekileyo kuKhristu uJesu:

2 Kakube kini umusa lokuthula okuvela kuNkulunkulu uBaba laseNkosini uJesu Khristu.

Izibusiso ZokukaMoya KuKhristu

3 Udumo kalube kuNkulunkulu uYise weNkosi yethu uJesu Khristu, osibusise ebukhosini basezulwini ngezibusiso zonke zomoya kuKhristu.

4 Ngoba wasikhetha kuye umhlaba ungakadalwa ukuba sibe ngcwele singelasici ebusweni bakhe. Ngothando 5 wasimisela ukuba senziwe amadodana akhe ngoJesu Khristu, ngokumayelana lentokozo yakhe kanye lentando yakhe – 6 ukuze kudunyiswe umusa wakhe omangalisayo, asiphe wona ngesihle kuLowo amthandayo. 7 Kuye silokuhlengwa ngegazi lakhe, lokuthethelelwa kwezono, ngokumayelana lengcebo yomusa kaNkulunkulu 8 awuthululele phezu kwethu ngenhlakanipho yonke langokuqedisisa.

9 Wasazisa imfihlakalo yentando yakhe mayelana lentokozo yakhe elungileyo ayiceba kuKhristu, 10 ukuba kuhlanganiswe ndawonye zonke izinto ezisezulwini lasemhlabeni ngaphansi kwenhloko yinye, enguKhristu.

11 Sakhethwa kuye, simiselwe lokho mayelana lecebo lakhe yena osebenza izinto zonke ngokuvumelana lenjongo yentando yakhe,

12 ukuze kuthi thina, esaba ngabokuqala ukuthemba kuKhristu, sibe ngabokubonga udumo lwakhe. 13 Lani labalwa kanye loKhristu, lapho selizwe ilizwi leqiniso. Selikholwe kuye, labekwa uphawu, uMoya oNgcwele owathenjiswayo, 14 oyisibambiso esiqinisela ilifa lethu kuze kube lokuhlengwa kwalabo abangabakaNkulunkulu – ukuba kubongwe udumo lwakhe.

Ukubonga Lokukhuleka

15 Ngenxa yalokhu, mina, sekulokhu ngizwe ngokukholwa kwenu eNkosini uJesu kanye lothando lwenu kubo bonke abangcwele,

16 angikaze ngiyekele ukulibongela, ngilikhumbula emikhulekweni yami. 17 Ngiyaqhubeka ngicela ukuba uNkulunkulu weNkosi yethu uJesu Khristu, uYise oyinkazimulo, alinike uMoya wokuhlakanipha lokwambulelwa, ukuze limazi ngcono. 18 Ngikhulekela njalo lokuthi amehlo ezinhliziyo zenu makakhanyiselwe ukuze lilazi ithemba alibizela kulo, inotho yelifa lakhe elimangalisayo kwabangcwele,

19 lamandla akhe amakhulu okungelakulinganiswa kithi thina esikholwayo. Amandla lawo afana lokusebenza kwamandla akhe amakhulu, 20 awasebenzisa kuKhristu emvusa kwabafileyo emhlalisa esandleni sakhe sokunene ebukhosini basezulwini, 21 ngaphezu kokubusa konke lobukhosi, lamandla kanye lombuso, lamabizo wonke angatshiwo, kungasikho ngalesisikhathi kuphela kodwa lakuleso esizayo. 22 UNkulunkulu wabeka izinto zonke ngaphansi kwezinyawo zakhe wamkhetha ukuba abe yinhloko yezinto zonke ebandleni, 23 lona elingumzimba wakhe, ukuphelela kwakhe yena ophelelisa izinto zonke ngezindlela zonke.